ტყვიის ყველაზე მაღალი მაჩვენებელი დასავლეთ საქართველოში დაფიქსირდა, სადაც დასასვენებლად ყველაზე მეტი ბავშვი ჩაჰყავთ

დაავადებათა კონტროლის ეროვნულმა ცენტრმა 2-7 წლის ბავშვებში სისხლში ტყვიის შემცველობის შესახებ  კვლევის შედეგები გამოაქვეყნა. ბავშვების სისხლში ტყვიის შემცველობის მაჩვენებელი რეგიონების მიხედვით განსხვავებულია. დაავადებათა კონტროლის ეროვნული ცენტრის ინფორმაციით, ყველაზე მაღალი მაჩვენებელი აჭარის რეგიონში ფიქსირდება.

მონაცემები ასე ნაწილდება:
სისხლში ტყვიის შემცველობა ტოლია ან აღემატება 5 მკგ/დლ-ს:

აჭარა – 85%

გურია-73%

სამეგრელო, ზემო სვანეთი – 71%

იმერეთი – 61%

სამცხე-ჯავახეთი – 32%

თბილისი – 30%

კახეთი – 25%

შიდა ქართლი – 21%

მცხეთა-მთიანეთი – 20%

ქვემო ქართლი – 18%

სულ: 41%

კვლევის შედეგებმა მოსახლეობაში გააჩინა საფუძვლიანი კითხვები, თუ რატომ აღმოჩნდა დასავლეთ საქართველოს იმ  რეგიონებში ტყვიის ასეთი მაღალი შემადგენლობა ბავშვებში, სადაც დასვენება და ჰაერის გამოცვლა რეკომენდირებულია თავად სპეციალისტების მხრიდან. 

ტყვიის ჯანმრთელობისთვის უსაფრთხო კონცენტრაცია ადამიანის ორგანიზმში არ არის დადგენილი. თუმცა, ჯანმრთელობის მსოფლიო ორგანიზაციისა და აშშ დაავადებათა კონტროლისა და რეკომენდაციების შესაბამისად, სხვადასხვა მასშტაბის საზოგადოებრივი ჯანდაცვითი ღონისძიებები უნდა დაიგეგმოს, როდესაც ვენურ სისხლში ტყვიის შემცველობა ტოლია ან აღემატება 5 მკგ/დლ-ს.

ორსულის ორგანიზმში ტყვიის მაღალი შემცველობა შეიძლება გახდეს სპონტანური აბორტის, მკვდრად შობადობის, ნაადრევი მშობიარობისა და ახალშობილის დაბალი წონის მიზეზი.