ვიტამინები და მინერალები
რკინა ელემენტია, რომლის დეფიციტსაც განსაკუთრებით უფრთხიან ორსულები. ეს გასაგებიც არის, რადგან მისი ნაკლოვანება ანემიას იწვევს, რაც მეტად უარყოფითად აისახება ნაყოფის სისხლმომარაგებაზე.
რკინას ორგანიზმი ყველაზე უკეთ ხორცპროდუქტებიდან ითვისებს. მართალია, ეს ელემენტი ხილშიც მოიპოვება, მაგრამ მეტად მცირე რაოდენობით შეიწოვება. მაგალითად, 100 გ ხორცისგან ორგანიზმი იმდენ რკინას ითვისებს, რამდენსაც 2 კგ ვაშლისგან.
კალციუმი აუცილებელია ნაყოფის ძვლების შენებისა და სიმტკიცისთვის. მისი დეფიციტი, გარდა ძვლების სიმყიფისა, კარიესს იწვევს.
კალციუმის მთავარი წყარო რძე და რძის ნაწარმია: ხაჭო, ყველი, მაწონი, იოგურტი, კეფირი. თუკი ორსული დღის განმავლობაში 100 გ ყველს, ნახევარ ლიტრ რძეს ან მაწონს მიირთმევს, კალციუმის მოთხოვნილებას შეივსებს.
რაც შეეხება ვიტამინებს, მოარული აზრით, ისინი ბევრია ხილსა და ბოსტნეულში, მაგრამ ყველა არა. B ჯგუფის, D, E და K ვიტამინებს ხილზე მეტად ხორცის ნაწარმში იპოვით.
აუცილებელი ცილები
მათ სხვაგვარად ორგანიზმის საშენ მასალასაც უწოდებენ. ცილა ორსულს (და, შესაბამისად, ნაყოფს) ყველაზე დიდი რაოდენობით მეორე ტრიმესტრში ანუ ნაყოფის აქტიური ზრდის პერიოდში სჭირდება. ორსულობის მე-5 თვიდან მოყოლებული, ქალმა დღეში 100გ-მდე ცილა უნდა მიიღოს.
მართალია, ცილა უამრავ საკვებში მოიპოვება, მაგრამ ჯანმრთელობისთვის ყველაზე მნიშვნელოვანი ცილები მაინც ცხოველურ სურსათშია თავმოყრილი. ტყუილად როდი დაარქვეს ამინომჟავებს (სწორედ მათგან შედგება ცილები) შეუცვლელი – ისინი ჩვენსავე ორგანიზმში კი არ წარმოიქმნება, არამედ საკვების მეშვეობით ხვდება იქ, თანაც მხოლოდ და მხოლოდ ცხოველურ პროდუქტებში მოიპოვება.
ამდენად, ორსულის ულუფა 100 გ ცილიდან 60% სასურველია ცხოველური წარმოშობის იყოს. აქედან 30% ხორცი და უცხიმო თევზი უნდა იყოს, 25% – რძის ნაწარმი, ხოლო 5% – კვერცხი. საერთო ჯამში, მენიუ დაახლოებით ასე გამოიყურება: 100-150 გ საქონლის (უმჯობესია ხბოს) ხორცი, 120-200 გ თევზი, 50-100 გ უცხიმო ხაჭო, 50-70 გ ყველი. დანარჩენი 40% ხილსა და ბოსტნეულზე მოდის.
ამდენად, ორსულის რაციონში აუცილებელია ცხოველური საკვების შეტანა.
ორსულებო, ვიკვებოთ ორის მაგივრად? – არავითარ შემთხვევაში..
კომენტარები: