“ჟირაფი ჟოზე”– ცვალებად სივრცეში შექმნილი, სრულიად ქართული პროდუქტია, რომლის კრეატიული გუნდი, დღეს უკვე გაზრდილია და მუდმივად სიახლეებს სთავაზობენ მაყურებელს.. – chicbebemagazine ესაუბრა– გიორგი მარშანიას, სტუდია „ველოსიპედის“ თანადამფუძნებელს ..
1. ვინ არიან თქვენი გუნდის წევრები და რა გამოცდილება აქვთ მათ?
სტუდია “ველოსიპედი” მე და ირაკლი ნადირაძემ დავაარსეთ. ვარ პროფესიით მსახიობი და ვამთავრებ თეატრის რეჟისურის მაგისტრატურას. ირაკლი მუშაობდა არასამთავრობო ორგანიაზიაციაში, ბავშვებისა და მოზარდების სოციალიზაციის მიმართულებით. ჩვენი გუნდის წევრები არიან: კემო, ვისთან ერთადაც თავდაპირველად გაჩნდა მულტფილმების კეთების იდეა. ასევე: გიორგი გაგლოშვილი, რუსკა ყვავაზე, თამუნა ზარქუა, ცოტნე რუსიშვილი, ტატო დუმბაძე – თითეული თავის სფეროში დიდი გამოცდილებით და წარმატებით მუშაობს…ჟოზეს ძალიან მაგარი სიმღერებით და მუსიკით ავსებს რეზო ბლიაძე (ჯგუფ “რეზო და ბავშვების ხელმძღვანელი და სოლისტი) და მიშა ცინცაძე (კომედი ჯგუფის სცენარისტი/მსახიობი) ყველა სიმღერის ტექსტს და დიალოგს ვასწორებ ზაზა ბიბილაშვილთან ერთად – პოეტი, იუმორისტი, სცენარისტი. ვფიქრობ, საუკეთესო გუნდი ვართ, ვინც შეიძლება შეკრებილიყო ანიმაციურ სტუდიაში!.
2. როგორ მიგიღოთ ქართველმა მაყურებელმა და რამდენად დაინტერესდნენ თქვენი ანიმაციით?
მაყურებელი თავიდანვე დაინტერესდა ჩვენი სერიებით, რომელიც რეალურად სიახლეს წარმოადგენდა ქართულ ინტერნეტ და ტელევიზიის სივრცეში. განვითარებულ ქვეყნებში საგანმანათლებლო ანიმაცია ძალიან პოპულარულია, ჩვენთან რეალურად “ჟირაფი ჟოზე” გახდა ის პირველი, ცნობადი და საყვარელი გმირი, რომელმაც მშობლებს და მასწავლებლებს შესთავაზა ბავშვის განათლებისა და განვითარების ალტერნატიული, მხიარული და რაც მთავარია ქართული პროდუქტი. ჩვენი იუთუბის არხის სტატისტიკიდან ჩანს,რომ ჯირაფი ჟოზეს სერიებს აქტიურად იყენებენ ბაღის აღმზრდელები და სკოლის მასწავლებლები. [ 14 თვეში 43 000 მდე გამომწერი და 28 000 000 მდე ნახვა ]
3. თუ გაქვთ უკვე პროექტები, რომლებზეც ამ ეტაპზე მუშაობთ და საახალწლოდ რას პირდებით პატარებს?
დეკემბერისთვის გვაქვს ორი ძალიან კარგი სიახლე: პირველი – მზადდება ჯირაფი ჯოზეს წიგნების სხვადასხვა სახეობები – ეს იქნება ისტორიები ჟოზეზე, აქტივობების წიგნი, ლექსიკონი და ა.შ. ჟირაფი ჟოზე გაცდება ტელევიზიას, ინტერნეტსივრცეს და უკვე წიგნებიდან იმეგობრებს ბავშვებთან. და მეორე – 28-29-30 დეკემბერს თუმანიშვილის თეატრი უმასპინძლებს ჟირაფი ჟოზეს საახალწლო ფესტივალს. წარმოგიდგენთ სპექტაკლს, რომლისთვის პიესა სპეციალურად ირაკლი სამსონაძემ დაწერა. სპექტაკლში მონაწილეობას მიღებენ თუმანიშვილის თეატრის მსახიობები. წარმოდგენის შემდეგ კი თეატრის დარბაზში მოეწყობა ჟოზეს საახალწლო ფესტივალი, ჩვენი მხარდამჭერი იქნება საბავშვო მაღაზიათა ქსელი შიკ ბებეც, გათამაშდება საჩუქრები, ბავშვები შეძლებენ ჟოზესთან ფოტოების გადაღებას, იქნება სხვადასხვა თამაშები და სიურპრიზები. ვფიქრობ სიახლეა და საინტერესოა იმ კუთხით, რომ სცენაზე ცოცხლდება თანამედროვე, ქართული მულტფილმის გმირი..
4. მომავალში თუ გეგმავთ ახალი ახალი სერიების გაგრძელებას? და თუ კი რას?
ჟოზეს სერიები აუცილებლად გაგრძელდება. სერიებში ნელ-ნელა ცოცხლდებიან სხვადასხვა პერსონაჟები. ჩვენ უკვე გავიცანით ჟოზეფინა. ასევე გავიცნობთ ჟოზეს მეგობრებს: მაიმუნს, სპილოს, ჩიჩილაკს და კურდღელს. სერიები იქნება არა მხოლოდ სიმღერები, არამედ უკვე ახალახალი საინტერესო ისტორიები. ჟოზეს მეგობრებს ძალიან ნიჭიერი მსახიობები ახმოვანებენ (სოფო მეძმარიაშვილი, კახა გოგიძე, ანა ზამბახიძე, დუტა სხირტლაძე) და დარწმუნებული ვარ, ახალ გმირებსაც მალე შეიყვარებს ჩვენი მაყურებელი. ასე რომ საახალწლო სპექტაკლის შემდეგ, ჟოზე მალევე დაიწყებს მუშაობას გაზაფხული-ზაფხულის სეზონზე. რა თქმა უნდა მთავარი ხაზი ისევ დარჩება შემეცნებით-საგანმანათლებლო, რადგან “ჟოზე” ბავშვებისთვის საყვარელი და მისაბაძი ანიმაციური გმირია, შესაბამისად პატარები მისგან ძალიან ბევრს კარგ თვისებეს იღებენ..
კომენტარები: