დიეტა ორსულებისთვის – მენიუ ტრიმესტრების მიხედვით

მთავარი წესია: ორსულობის პერიოდში კვება უნდა იყოს საკმარისი და არა ზედმეტი. უნდა ჭამოთ არა ორის მაგივრად, არამედ ორისთვის. მომავალი დედის ენერგეტიკული და საკვების მოთხოვნილებების დასაკმაყოფილებლად საკმარისია, რაციონის კალორიულობა გაზარდოთ მაქსიმუმ 20 პროცენტით, საშუალოდ კი ის არ უნდა აღემატებოდეს 2 500 კილოკალორიას – ორსულობის პირველ ნახევარში და 2 900 კილოკალორიას – მეორე ნახევარში. არ დაგავიწყდეთ წონის კონტროლი, განსაკუთრებით ორსულობის მეორე ნახევარში. არ არის რეკომენდებული წონაში კვირაში 300-350 გრამზე მეტის მომატება, თუმცა ეს ყველაფერი ინდივიდუალურია. გამხდარ ორსულებს შეუძლიათ, ჯამში 14 კილოგრამი მოიმატონ; ნორმალური წონის ორსულებს – 10-12 კილოგრამი, ხოლო ჭარბწონიანებს – 7-9 კილოგრამი. ძალიან მნიშვნელოვანია კვების ჯერადობა  და რეჟიმი: უნდა მიირთვათ მცირე ულუფებით, დღეში 5-6-ჯერ, 2-3-საათიანი შუალედებით.

ორსულობის პირველ ტრიმესტრში ხდება ნაყოფის ორგანოების ჩამოყალიბება. ამ პერიოდში განსაკუთრებით მნიშვნელოვანი ვიტამინებია: ფოლიუმის მჟავა (ვიტამინი B9), ვიტამინი B12 და თუთია. B9-ს შეიცავს: ღვიძლი, ოსპი, ისპანახი, პარკოსნები. მაგრამ, ორგანიზმისთვის ფოლიუმის მჟავის საკმარისი რაოდენობის მიწოდება მხოლოდ პროდუქტებით შეუძლებელია, ამიტომ ეს ნივთიერება დამატებით უნდა მიიღოთ. ექიმთან შეთანხმებით დაადგინეთ დოზები – დღეში 400-დან 800 მილიგრამამდე.
B12 ვიტამინს შეიცავს: ხორცი, კვერცხის გული, რძის პროდუქტები; თუთიას – ზღვის პროდუქტები, გაღივებული მარცვლეული.
მეორე ტრიმესტრში ნაყოფი აქტიურად იზრდება და იმატებს წონაში. ფუნქციონირებას იწყებს მისი საკუთარი ორგანოები. ამ პერიოდში განსაკუთრებით მნიშვნელოვანი მინერალებია კალციუმი და რკინა. ორსულის ორგანიზმმა დღეში უნდა მიიღოს მინიმუმ 1 200-1 500 მილიგრამი კალციუმი, რომელსაც ჭარბად შეიცავს: ყველი, ხაჭო, მწვანე ბოსტნეული. იმისათვის, რომ კალციუმი სრულყოფილად აითვისოს ორგანიზმმა, აუცილებელია მისი ორი „მეწყვილის“ თანამონაწილეობა. ესენია მაგნიუმი და ფოსფორი (ხორცი, თევზი, კვერცხი, პური, ახალი ბოსტნეული; რკინის წყაროა ხბოსა და ინდაურის ხორცი).
მესამე ტრიმესტრში განსაკუთრებული ყურადღება მიაქციეთ ცილების, ცხიმებისა და ნახშირწყლების თანაფარდობას. სრულყოფილ ცილებს („სამშენებლო მასალას“ მზარდი ნაყოფისთვის) შეიცავს უცხიმო რძის პროდუქტები. ყოველდღიურ რაციონში ჩართეთ: 1 სადილის კოვზი ზეითუნის ზეთი; ხშირად მიირთვით თევზი. „სწორ ნახშირწყლებს“ შეიცავს საკვები ბოჭკოებით მდიდარი პროდუქტები (ხორბლის პური, ბურღულეული).
ყურადღებით გაეცანით ჩვენს რჩევებს, ზუსტად შეასრულეთ ისინი და თქვენი ორსულობა უპრობლემოდ ჩაივლის.