დაწყებით კლასებში მოსწავლეებს არა საგნებს, არამედ ზრდილობას ასწავლიან. იაპონია

იაპონელები მსოფლიოს ერთ-ერთი ყველაზე განათლებული ხალხია: საერთაშორისო კვლევების მიხედვით, იაპონიის მოსახლეობა 100-პროცენტიანი წიგნიერების ზღვარს აღწევს.

იაპონიის საგანმანათლებლო სისტემა მკაცრი იერარქიის მქონე სტრუქტურაა. განათლების სამინისტრო აკონტროლებს როგორც სასწავლო გეგმას, სახელმძღვანელოების შემუშავებისა და გრიფირების სისტემას, მეთოდიკური გზამკვლევებისა და ტესტების შემუშავებას, ისე სასწავლო პროცესის მსვლელობასაც.

გარდა დაწყებითი სკოლის დაბალი კლასებისა, სასწავლო დღის საშუალო ხანგრძლივობა იაპონიის სკოლებში 6 საათს უდრის, რაც მთელ მსოფლიოში ერთ-ერთი ყველაზე ხანგრძლივი მაჩვენებელია.

მიაჩნიათ, რომ პირველი 3 წლის განმავლობაში, იაპონიის სკოლის მიზანი მოსწავლეებისთვის კონკრეტული ცოდნის მიცემა და შემდეგ შეფასება არ არის.

პირველ რიგში, მოსწავლეები სწავლობენ კარგ მანერებს, ზრდილობას და ივითარებენ ხასიათს. მათ ასწავლიან იმას, თუ როგორ უნდა იყვნენ კეთილები, გულუხვები, შემწყნარებლები. ასევე ასწავლიან სხვა ადამიანების პატივისცემას, ცხოველებისა და ბუნების მიმართ თავაზიან და ჰუმანურ დამოკიდებულებას. ამის შემდეგ კი, ისინი სწავლობენ თავშეკავებას, თვითკონტროლსა და სამართლიანობას და მხოლოდ ამის მერე გადადიან სასწავლო პროგრამის შესწავლაზე.