“აჩუქე წიგნი” – ასე ჰქვია კამპანიას, რომელიც საქართველოს პარლამენტის ეროვნულმა ბიბლიოთეკამ და „ანაგრამამ“ წამოიწყო და რომელიც 23 აპრილის წიგნის ჩუქების დღედ გამოცხადებას გულისხმობდა. ეროვნული ბიბლიოთეკის დირექტორის გიორგი კეკელიძის ინიციატივით საქართველოში ჩაეყარა საფუძველი, ერთ ძალიან ძვირფას და თანაც ძალიან იაფ ტრადიციას- წიგნის ჩუქების დღეს.
გუშინ #აჩუქე წიგნი-ს კამპანიაში ყველა მოქალაქე, ბიზნესი აქტიურად იყო ჩართული… chicbebemagazine გთავაზობთ ინტერვიუს ბ-ნ გიორგი კეკელიძესთან. რა წავუკითხოთ ბავშვებს და როგორ შევაყვაროთ კითხვა? ეროვნული ბიბლიოთეკის და ცნობილი მწერლის რჩევები.
_როგორი ბავშვი იყავით?
აი, ერთი მაგალითი: პირველად ბებიაჩემის მოსწავლე მიყვარდა. სახელად თეონა. გვარი არ მახსოვს. უჩვეულო ამ ამბავში არაფერი იქნებოდა, რომ არა ერთი პატარა უხერხულობა: მე ხუთი წლის ვიყავი, ის _ მერვეკლასელი. ცხადია, თეონას ბებიაჩემმა უთხრა „ესე საქმე დამალული“. იმ თეონამ კი რატომ მოიგონა, არ ვიცი _ ერთ-ერთი გაკვეთილის შემდეგ, რომელსაც ბებიაჩემის ამბავში ვესწრებოდი (სახლში ჩემი დამტოვებელი არ ჰყავდა), მითხრა, მე „შავი ბიჭები“ მომწონსო. ვიფიქრე, რომ „შავში“ დაუბანლობას გულისხმობდა და დაბანას მთელი კვირა ვაპროტესტებდი. ამდენის მოთმენა შეუძლებელი იყო. ლამის გამთოკეს და ისე დამბანეს. ჰოდა, ამ ძალად განბანის მერე ხმამაღლა ვყვიროდი, როგორც გამასუფთავეთ, ისე გამაშავეთ, თორემ წყალში გადავხტები-მეთქი. მერე ბუხრიდან გამოიღეს ნახშირი და წამისვეს. ეს ბებიაჩემის ერთ-ერთი საყვარელი მოსაყოლი ამბავი გახლდათ და, ამასთან, ჩემი პირველი ტრაგიკული სამიჯნურო საქმე.
_რა წვლილი აქვს მშობელს ბავშვის ინტელექტუალურ განვითარებაში ,თქვენი აზრით, როგორი უნდა იყოს თანამედროვე მშობელი?
ძალიან დიდი. ბავშვი საწყის ეტაპზე ოჯახში ყალიბდება, ადამიანი კი ბაძვის არსებაა წიგნი ყველას ვერ ეყვარება, მაგრამ სიყვარულის მიღმა, ჩვენ მისი მნიშვნელობა უნდა ვიცოდეთ და ამიტომ ვკითხულობდეთ. წიგნი ერთად მოიცავს: ცოდნასაც და განცდასაც, სიხარულსაც და ტკივილის გაძლების სწავლსაც, ნივთს, ჩაფიქრებას, დაკვირვებას, ამ დაკვირვებით გაკვირვებას. წიგნი კაცობრიობის მეხსიერების ჯამია, ისეთივე გამოცდილება, როგორიც მე და შენ გვაქვს. და რაღაც აზრით, წინასწარი გამოცდილებაც .
–როგორ შევაყვაროთ პატარებს კითხვა? _ბავშვებს ძალიან უყვართ თქვენი საბავშვო ლიტერატურა .. რისი წერა განიჭებთ ყველაზე დიდ სიამოვნებას?
თომას ზღაპრებმა ძალიან დამაახლოვა პატარებს. უკვე არაერთ სკოლაში ვასწავლი და ხშირად დავდივარ საბავშვო ბაღებში. ამ აზრით ჩემთვის ყველაზე საყვარელი საქმე მართლა მათთვის წერაა.
_ თქვენს ინიციატივას, წიგნის საერთაშორისო დღესთან დაკავშირებით ყველა აქტიურად შეუერთდა, როგორ ფიქრობთ, რით დაიმსახურეთ ეს სიყვარული და აღიარება?
არ მგონია რომ ამდენ ადამიანს ვუყვარდე, უბრალოდ ალბათ ხალხს პოზიტიური ამბები მოენატრა.
კომენტარები: